San Juan Bezpera dela eta, ohizko San Juan Sua. Dantza eta musika emanaldiak eta Santa Ageda Mutilak ohizko "tantaia" jasoko dute plazan.

• Datu orokorrak
• Mapa
• Antolatzailea
• Lotura interesgarriak

San Joan bezperan, ekainaren 23an, hurrengo urtean Santa Ageda mutil izango direnek tantaia altxatzen dute, herriko plazaren erdian. Azken urte hauetan, pinuak txopoaren lekua hartu du. Izan ere, mota guztietako zuhaitzak jarri izan dira Aretxabaletan; bete beharreko baldintza bakarra, zuhaitz luze, zuzen eta mehea izatea da.

Garai batean, tantaia lapurtu egiten zuten inguruko baserriren baten. Orain, berriz, Santa Ageda mutilek aurkitzen duten arren, Udalak ordaindu egiten dio baserritarrari.

Bestalde, tantaiaren puntan aza, kipula eta berakatza jartzen da, eta 1976 urtetik aurrera, ofizialki ikurrina ere jartzen da. Egun honetan, Santa Ageda mutilek gazta, ogia eta ardoa erosten dute plazan dagoen jendeari eskaintzeko. Gainera, tantaia altxatu ondoren, pixa egiten diote ipurdira.

Tantaia San Pedro biharamunera arte (ekainaren 30a arte) herriko plazaren erdian egoten da.

EGITARAUA 2019:

Ekainak 23, igandea:

• 18:00: Leizarra musika eskolaren emanaldia: "Plaza dantza". Musika eskolako dantzariei, gurasoei eta ikuslegoari zuzenduta.
  
  
• Jarraian: Buruhandiak eta erraldoiak Aretxabaletako txistularien laguntzaz.
  
  
• 21:00: ALAIKI taldearen dantzaldia
  
  
• 22:20: San Juanetako Kalejira, Mitarte 8tik irtengo da plazarantz eta jarraian Leizarra musika eskolaren eskutik San Juanetako zortzikoa.
  
  
• 22:30: SAN JUAN SUA eta ondoren ALAIKI taldearen dantzaldia. Bukatzeko, Santa Ageda neska mutilek tantaia jasoko dute Herriko Plazan.